தொடக்கம் தெரியுமா?

எதற்கும் தொடக்கம் என்று ஒன்று உண்டு. அந்த வகையில் சிறப்பான தொடக்கங்கள் பெற்ற பல கண்டுபிடிப்புகள், முதன்முதலாக நடந்தேறிய சம்பவங்கள் ஆகியவை வரலாற்றில் முத்திரை பதித்துள்ளன. முதல் கண்டுபிடிப்புகளிலும், முதல் சம்பவங்களிலும் பல்வேறு சுவாரசியங்கள் பொதிந்திருக்கும். மைக்ரோ ஓவன் கண்டுபிடிக்கப்பட்டதில் பெரும் சுவாரசியம் ஒளிந்துள்ளது. இரண்டாம் உலகப்போரின்போது ராடார் தொடர்பான ஆராய்ச்சியில் ஈடுபட்டிருந்த டாக்டர் பெர்ஸி ஸ்பென்ஸர் வேலை பார்த்துக்கொண்டு இருந்தபோது மைக்ரோ வேவ் ராடார் ஒன்றின் அருகே நின்று கொண்டிருந்தார். அப்போது தன் பாக்கெட்டில் இருந்த சாக்லெட் உருகுவதைச் சட்டென கவனித்தார். அடுத்த நாள் மக்காச் சோளத்தின் மீது மைக்ரோ அலைகளைச் செலுத்தினார். பாப்கார்ன் பொரிந்து பரிசோதனைச் சாலை முழுவதும் சிதறியது. ஸ்பென்ஸரின் உற்சாகம் எல்லை கடந்தது. அடுத்த நாள் மைக்ரோ அலைக்கு அருகே ஒரு முட்டையை வைத்தார். முட்டையின் உள்ளே வெப்பம் அதிகமானது. ஸ்பென்ஸரின் உதவியாளர் அந்த முட்டையையே உற்றுப் பார்த்தார். அந்த முட்டை பட்டென்று வெடித்தது. இதைப் பார்த்த ஸ்பென்ஸரின் மனதில், ‘ஒரு முட்டையை இவ்வளவு சீக்கிரம் சமைக்க முடிந்தால், இந்த அலைகளைக் கொண்டு பிற உணவுப் பொருட்களையும் சமைக்க முடியாதா என்ன?’ இப்படிப் பிறந்ததுதான் மைக்ரோ ஓவன். இது எப்படி இருக்கு? இதுபோன்ற ஏராளமான பயனுள்ள தொடக்கங்களை வாசகர்களுக்காக இந்த புத்தகத்தில் எழுதிக் குவித்துள்ளார் நூலாசிரியர் ஜி.எஸ்.எஸ். தொடக்கத்தை அறிய... தொடர்ந்து பக்கத்தைப் புரட்டுங்கள்!