கடல்வழி வணிகம்

நாகரீக வளர்ச்சியின் முக்கியப் பங்காக இருப்பது பயணங்களே. தமிழர்கள் முற்காலத்தில் கடல்வழி வணிகத்தில் எப்படிச் சிறந்தவர்களாக இருந்தார்கள் என்பதை இலக்கியத்தினூடே சொல்லி இருந்தாலும் தொல்லியல் துறை கண்டுபிடித்த சாட்சிகளுடன் நரசய்யா விவரிக்கிறார் அக்கால மனிதர்களின் திறமைகளை. வணிகர்களே மாற்றத்தை கொண்டு வருபவர்களாக இருந்திருக்கிறார்கள், இந்தியா அடிமைப்பட்டுக்கிடந்ததற்குத் தொடக்கப்புள்ளியை உண்டாக்கிய மேல்நாட்டு வணிகர்கள் தங்கள் திறமையாலும் இங்கே ஆளும் மன்னர்களின் ஒற்றுமையின்மையாலும் அதிகாரத்தைத் தங்கள் வசமாக்கி உரிமையில்லாத மண்ணின் செல்வங்களைக் கொள்ளையடித்துச் சுரண்டியது சுதந்திர வேட்கையை மக்களிடம் தூண்டிவிட்டது என்பதைப் பல வரலாற்றுச் சம்பவங்களில் படித்திருந்தாலும் இதில் கப்பல் தொழிலில் அவ்வரலாற்று நிகழ்வுகள் எம்மாதிரியான தாக்கத்தைக் கொண்டுவந்தது என்பதைப் பல சாட்சிகளுடன் சொல்லிச் செல்கிறார் ஆசிரியர். கடல் வணிகத்தில் சிறந்திருந்த ராஜ்ஜியங்கள் ஆங்கிலேயரிடம் அடிமைப்பட்டு அதை அவர்கள் நசுக்கி அழித்ததால் காணாமல் போய் இருந்ததை மெல்ல தேவைகளுக்கு ஏற்ப மீட்டெடுத்து வந்தாலும் பல பலிகளைக் கொண்டே துறைமுகங்கள் அமையப் பெற்றது. வரலாறுகள் சொல்லிச் செல்வது ஒன்றே தான் காலச் சக்கரம் எதையும் எவற்றையும் ஒரே இடத்தில் ஒரே மாதிரி நிலை பெற விடுவதில்லை,மாற்றங்களைப் புகுத்திக்கொண்டே அதற்குப் பல நூறு பெயர்களையும் சூட்டிச் செல்கிறது.