நீதிக்கட்சி வரலாறு

பண்டித முத்துசாமிப் பிள்ளையின் நீதிக்கட்சி வரலாறு குடிஅரசு இதழ் மதிப்புரையின்படி 1940ஆம் ஆண்டு அதன் முதல் பதிப்பு வெளியாகி இருக்கிறது என்பதை உறுதியாக நம்பலாம். அடுத்து நாம் பார்க்க வேண்டியது இந்நூலில் இருக்கும் உள்ளடக்கம் நமக்குச் சில அக்காலத்தில் நிகழ்ந்த முக்கியச் செய்திகளை முன் வைக்கிறது. அதனை நாம் நூலினுள்ளே இருக்கிறபடி 'அது என்ன செய்தி' என்பதை தெளிவாக்க விரும்புகின்றோம். இவ்வாய்வுரைக்குப் பிறகு பண்டிதரின் நூலைப் படிக்க முனைவோர் இச்சிறு நூலின் அகன்றாழ்ந்த அடர்த்தியை அறிந்து கொள்வர். நீதிக்கட்சியைத் தொடங்குவதற்கு முன்னுள்ள சூழ்நிலையை மிகச் சுருக்கமாக எடுத்து வைக்கும் இந்நூல் அதன் கடைசிப் பத்தியில் இந்தியாவுக்கு சுயாட்சி வழங்கப்படுமானால் பார்ப்பனர் அல்லாதாரின் நிலைமை எவ்வளவு கேவலமாகும் என்கிற அச்சத்தை வெளிப்படுத்துகிறது. அதோடு 1916க்கு முன் என்று தலைப்பிடப்பட்டுள்ள அத்தியாயத்தில் முக்கியச் செய்தியாக இந்நூலினைப் படிப்போர் கவனிக்க வேண்டிய புள்ளிகள் சில இருக்கின்றன. அதாவது கிழக்கிந்திய கம்பெனியார் இங்கே வந்து அதிகாரத்தைப் பற்றியபோது அவர்களிடத்தில் பணியாற்றியவர்கள் பார்ப்பனர் அல்லாதாரே ஆவர். அவர்களுள் இராணுவத்தில் சேர்ந்து பணியாற்றியவர்கள் ஒடுக்கப்பட்டவர்களே ஆவர். இதனை அயோத்திதாச பண்டிதரும் சொல்கிறார். இதன் பிறகுதான் பார்ப்பனர்கள் கம்பெனியாரின் அதிகாரத்திற்குள் நுழைந்து பதவியைப் பெறுகிறார்கள். இதனை எடுத்துச் சொல்கிறார் பண்டித முத்துசாமிப் பிள்ளை அவர்கள். மேலும் பார்ப்பனர்களைக் கைதூக்கிவிட்ட பார்ப்பனர் அல்லாதவர் பற்றியும் குறிப்பிட்டு இருக்கிறார்.