பணம் பண்ணலாம் வாங்க

சாலையைக் கவனியுங்கள். எல்லோரும் பரபரப்பாக ஓடிக் கொண்டிருப்பதைப் பார்க்கலாம். எதற்கு இந்த பரபரப்பு? பணம் தேடத் தான் அல்லது தேடி வைத்துள்ள பணத்தைச் செலவழிக்கத் தான். ஏன், சில சமயம் அதிகரிக்கக் கூட இருக்கலாம். இந்த உலகத்தில் எல்லோருடைய ஓட்டமும் இரண்டு விஷயங்களுக்காகத் தான். ஒன்று. பணம், மற்றொன்று புகழ். புகழ் பணத்தைத் தருகிறதோ இல்லையோ பணம் புகழைத் தருகிறது. சாதனையாளர் பட்டியலைப் போன்று வருடாவருடம் பணக்காரர் பட்டியலும் வெளியிடப்படுகிறது. வாழ்வில் நல்ல நிலையை அடையவும் விருப்பங்களை நிறைவேற்றவும் பணம் தேவைப்படுகிறது. நமது கல்வி, திருமணம், வாழ்க்கை முறை என்று ஒவ்வொரு கட்டத்தையும் பணம் தான் தீர்மானிக்கிறது. செல்வம் நிறைந்த நாடுகளே பல துறைகளிலும் முன்னேறி வளர்ந்த நாடுகளாகி உள்ளன. ஒரு நாடு வளர அந்த நாட்டிலுள்ள ஒவ்வொருவரும் முன்னேற வேண்டும், சாதனையாளர்கள் சாதித்துக் காட்டவும் பணம் தேவை. பணம் யாரிடம் சேரும்? தன்னம்பிக்கை, விடா முயற்சியுடன் உழைப்பவரிடமே பணம் சேரும். தேடி சம்பாதித்த பணத்தை பத்திரமாகப் பாதுகாப்பது மிகவும் முக்கியம். அப்படியே உழைத்துச் சேர்த்த பணத்தை சிறந்த வழியில் சேமிப்பவரிடமே அது நிலைத்திருக்கும். பொருள் இல்லார்க்கு இவ்வுலகம் இல்லை. எனவே பொருளைச் சேருங்கள். சேர்த்த பொருளைப் பெருக்குங்கள்.