புயலின் மையம்

புதிய புதிய அனுபவங்களை நாடிச் சென்று அவற்றை படைப்பாக்கம் செய்து வந்த புதுமை எழுத்தாளர் ராஜம் கிருஷ்ணன். இந்த புயலின் மையமும் அப்படித்தான். கோவாவின் விடுதலைப் போராட்டத்தைப் பற்றிய தகவல்களை அவர் திரட்டிய பொது , கேட்டறிந்த தகவல்கள் அவரை திடுக்கிடச் செய்தன. போர்ச்சுகீசிய தனியறைச் சிறைக்கொடுமைகளால் மனித மனம் பாதிப்படைந்தது பற்றிய விவரங்கள் இந்தப் புயலின் மையத்தை உருவாக்க அவரைப் பணித்தன. சிறைக்கொடுமைகளால் பாதிக்கப்பட்ட ஒரு இளைஞன், அவன்தான் நாயகன் ராஜகோபாலன், விடுதலைக்குப் பாடுபட்டவன் நிலைகுலைந்து போனவனாகிறான்.இத்தருணத்தில் அவன் மனைவியான காத்யாவின் நிலை, ராஜகோபாலின் தாயார் படும் வேதனை என இவர்களின் ஆழ்மனத்தின் வெளிப்பாடுகளை சித்தரிக்கிறார் நூலாசிரியர் ராஜம் கிருஷ்ணன்.